மாணவர்கள் ஊக்கத்தொகை உயர்வு, முதல்வர் ஜெ., பட்டியல்

சட்டசபையில், ஐந்து ஆண்டுகளில், 110வது விதியின் கீழ் அறிவித்து நிறைவேற்றப்பட்ட திட்டங்களை, முதல்வர் ஜெயலலிதா பட்டியலிட்டு உள்ளார். அவரது அறிக்கை: கைத்தறி, கைத்திறன், துணிநுால் மற்றும் கதர்துறை, ஆதிதிராவிடர் மற்றும் பழங்குடியினர் நலத்துறை மற்றும் சுற்றுச்சூழல் மற்றும் வனத்துறை ஆகிய மூன்று துறைகளிலும், கடந்த ஐந்தாண்டுகளில், 110வது விதியின் கீழ் அறிவிக்கப்பட்டு, நிறைவேற்றப்பட்ட திட்டங்கள் வருமாறு:

கைத்தறி, கைத்திறன், துணிநுால் மற்றும் கதர்துறை:
 கூட்டுறவு கைத்தறி நெசவாளர் சேமிப்பு மற்றும் பாதுகாப்பு திட்டத்தின் கீழ் செலுத்தப்படும், மாநில அரசின் பங்கான, நான்கு சதவீதம், எட்டு சதவீதமாக உயர்த்தி வழங்கப்பட்டு உள்ளது

 மல்பரி நடவு மானியம் உயர்த்தி வழங்கப்பட்டு உள்ளது

 பட்டு ரக துணிகளின் விற்பனைக்கு உச்சவரம்பின்றி, 10 சதவீதம் சிறப்பு தள்ளுபடி வழங்கப்பட்டு உள்ளது

ஆதிதிராவிடர் மற்றும்பழங்குடியினர் நலத்துறை
 முழு நேர முனைவர் பட்டப்படிப்பை மேற்கொள்ளும், ஆதிதிராவிடர் மற்றும் பழங்குடியின மாணவ, மாணவியருக்கு, ஊக்கத்தொகை, 50 ஆயிரம் ரூபாயாக உயர்த்தப்பட்டு, நான்கு ஆண்டுகளுக்கு வழங்கும் திட்டம் செயல்படுத்தப்பட்டு வருகிறது

 தமிழகத்தில் உள்ள, 76 ஆதிதிராவிடர் மற்றும் பழங்குடியின மாணவியருக்கான, கல்வி ஊக்குவிப்பு சிறப்பு திட்டம், ஏழாம் வகுப்பு மற்றும் எட்டாம் வகுப்பு படிக்கும், ஆதிதிராவிடர் மற்றும் பழங்குடியின மாணவியருக்கும் விரிவுபடுத்தப்பட்டு உள்ளது

 ஆதிதிராவிடர் மற்றும் பழங்குடியின மாணவர்களுக்காக, எட்டு மாவட்டங்களில், தலா ஒரு கல்லுாரி விடுதி, பெரம்பலுார் மாவட்டத்தில் இரண்டு விடுதிகள் துவக்கப்பட்டு உள்ளன

சுற்றுச்சூழல் மற்றும்வனத்துறை
 தமிழ்நாடு வனத்தோட்டக் கழகத்தின் பணிகள், மேலும் சிறக்கும் வகையில், 4,500 எக்டேர் பரப்பளவில், மரக்கூழ் தோட்டங்களும், 800 எக்டேர் பரப்பில், உயர் விளைச்சல் ஒட்டு முந்திரி கன்றுகளும், நடவு செய்யப்பட்டு உள்ளன

 திருநெல்வேலி மாவட்டத்தில், உயிர் பன்மை செரிந்துள்ள பகுதிகளை உள்ளடக்கி, 'நெல்லை வன உயிரின வன சரணாலயம்' ஏற்படுத்தப்பட்டு உள்ளது

இவ்வாறு முதல்வர் ஜெ., தெரிவித்துஉள்ளார்.