கல்விக்கு உதவ அறக்கட்டளைகள் முன்வர வேண்டும்: நீதிபதி கர்ணன்

ஏழை, எளிய மாணவர்கள் கல்வி பயில்வதற்கு அறக்கட்டளைகள் முன்வர வேண்டும் என சென்னை உயர் நீதிமன்ற நீதிபதி சி.எஸ். கர்ணன் தெரிவித்தார். 

ராஜஸ்தானி தமிழ்நாடு சங்கம் ஒவ்வொரு ஆண்டும் மாணவர்களுக்கு கல்வி உதவித்தொகை வழங்கி வருகிறது. இதன் தொடர்ச்சியாக நிகழாண்டுக்கான கல்வி உதவித்தொகை வழங்கும் நிகழ்ச்சி, சென்னை மியூசிக் அகாதெமியில் ஞாயிற்றுக்கிழமை நடைபெற்றது.

 இதில், பல்வேறு கல்லூரிகளில், பல்வேறு துறைகளில் பயின்று வரும் ஏழை மாணவ, மாணவியர்களுக்கு கல்வி உதவித்தொகை வழங்கப்பட்டது. ராஜஸ்தானி தமிழ்நாடு சங்கத் தலைவர் சுபாஷ்சந்த் ரங்கா, செயலாளர் பிரவீன் குமார் டாடியா, சங்க நிர்வாகிகள் நிகழ்ச்சியைத் தொடக்கி வைத்தனர். 

 பினனர், சென்னை உயர் நீதிமன்ற நீதிபதி சி.எஸ் கர்ணன், திரைப்பட நடிகர் ஸ்ரீ காந்த், நகைச்சுவை நடிகர் சூரி உள்ளிட்டோர் சிறப்பு விருந்தினர்களாக கலந்து கொண்டு கல்வி உதவித்தொகையை மாணவர்களுக்கு வழங்கினர்.

 நிகழ்ச்சியில் நீதிபதி சி.எஸ். கர்ணன் பேசியதாவது: பள்ளியில் பயிலும் போது மதிய உணவு சாப்பிட்டும், அரசின் கல்வி உதவித்தொகை பெற்றும் படித்து சட்டம் பயின்றேன். சரியான நேரத்தில், சரியான உதவி கிடைத்ததால் நீதிபதி பதவி முன்னேற்றம் அடைந்துள்ளேன். இது போல ஏழை மாணவர்களுக்கு கல்வி பயில்வதற்கு அறக்கட்டளைகள் முன்வருவது மட்டுமில்லாமல்,சரியான நேரத்தில் உதவி புரிந்தால் பெரிதும் பயனடைவர். 

 மாணவர்களும் அரசு, தொண்டு நிறுவனங்கள் வழங்கும் உதவித்தொகையைச் சரியாகப் பயன்படுத்தி கல்வியில் முன்னேற்றம் காணவேண்டும் என்றார்.