அரசு அனுமதியின்றி சென்னையில் மழலையர் பள்ளிகள்: உயர்நீதிமன்றத்தில் வழக்கு பதிவு

அரசு அனுமதியின்றி சென்னையில் செயல்படும் மழலையர் பள்ளிகள் மீது நடவடிக்கை எடுக்கக் கோரி சென்னை உயர்நீதிமன்றத்தில் வழக்கு தொடரப்பட்டுள்ளது.

வழக்கறிஞர் பாலசுப்பிரமணியம் என்பவர் தாக்கல் செய்த மனு, சென்னை உயர்நீதிமன்ற நீதிபதிகள் பால்வசந்த குமார் மற்றும் ரவிச்சந்திர பாபு முன் விசாரணைக்கு வந்தது. அதில், சென்னையில் 5 ஆயிரத்திற்கும் மேற்பட்ட மழலையர் பள்ளிகள் செயல்படுவதாகவும், அவற்றில், 760 மழலையர் பள்ளிகள் அரசு அங்கீகாரம் பெறாமல் இயங்குவதாகவும் குறிப்பிட்டார். மேலும், இந்த பள்ளிகளில் கூடுதல் கட்டணம் வசூலிக்கப்படுவதாகவும், இது பள்ளிகள் வரன்முறை சட்டத்திற்கு எதிரானது என்றும் வழக்கறிஞர் பாலசுப்பிரமணியன் தெரிவித்தார். வழக்கை விசாரித்த நீதிபதிகள், இது தொடர்பாக, இரண்டு வார காலத்திற்குள் பதிலளிக்குமாறு பள்ளி கல்வித்துறை செயலாளர் மற்றும் இயக்குநர், மெட்ரிகுலேஷன் பள்ளி இயக்குநருக்கு உத்தரவிட்டுள்ளனர்.